Немисча мусиқада шарқона мотивлар

2010-09-06

17 сентябрь куни пойтахтимиздаги “Туркистон” санъат саройида Ўзбекистон Республикаси камера оркестрининг германиялик ижрочилар иштирокидаги “Шарқ ва Гендель” деб номланган концерт бўлиб ўтади. Ушбу концерт Германия Федератив Республикаси элчихонаси ва Фонд Форум ва бошқа ташкилотлар ҳамкорлигида ташкил этилган. Таниқли бастакор ижодида шарқона жилолар акс этади. Концерт дастури “Ўзбекистон Германия кунлари” дастурининг илк тадбирига айланади.

Борокка даврининг буюк бастакори Георг Фридрих Гендель ўзининг қатор операларида шарқона унсурларга мурожаат этган. Ушбу ўзига хос мусиқий тадбирда Давлат камера оркестрининг мусиқачилари Гендель асарларида шарқона мотивларни ўрганиб, уларни опера услубида намоён этишади. Булар тарихий Шарқнинг қадимий даргоҳларида мухлислар эътиборига ҳавола этилади.

Шарқона ва ғарбона анъаналарнинг уйғунлашуви мароқли концерт дастурига айланиши кутилмоқда. Концерт Тошкентдан сўнг 21 сентябрь куни Самарқандда, 19 сентябрь куни Шахрисабзда ҳам намойиш этилади.

“Ўзбекистонда Германия кунлари” лойиҳаси доирасида сентябрь-ноябрь ойларида Ўзбекистоннинг Тошкент ва бошқа шаҳарларида Германия Федератив Республикасининг Ўзбекистондаги элчихонаси, Гёте Институти, Фонд Форум ва бошқа ташкилотлар ҳамкорлигида видео-артга бағишланган кўргазма, қатор мавзувий кўргазмалар, мумтоз ва жаз мусиқаси концертлари, қўл қўғирчоқлари орқали тилни ўрганиш бўйича маҳорат дарси, шунингдек, футбол бўйича германо-ўзбек турнири ўтказилиши режалаштирилган.